Hormuz bo‘g‘ozi blokadasi: 45 mln kishiga oziq-ovqat tanqisligi xavf solmoqda
BMTga ko‘ra, bo‘g‘oz orqali o‘g‘it tashuvchi kemalar qatnovi tiklanishi lozim.
Rivojlanayotgan mamlakatlarda yashovchi qariyb 45 mln kishi Hormuz bo‘g‘ozining blokadaga olinishi sababli oziq-ovqat tanqisligiga duch kelishi mumkin. BMT bunday holat gumanitar inqirozga olib kelishi mumkinligidan ogohlantirdi.
BMT Loyihalarga xizmat ko‘rsatish boshqarmasi direktori Jorji Moreyra da Silva gumanitar inqirozning oldini olish uchun Hormuz bo‘g‘ozi orqali har kuni kamida 5–7 ta o‘g‘it tashuvchi kema o‘tkazilishi kerakligini aytdi.
Uning ta’kidlashicha, o‘g‘it yetkazib berish rivojlanayotgan mamlakatlar uchun oziq-ovqat xavfsizligini ta’minlashda hal qiluvchi ahamiyatga ega. Aks holda, bu davlatlar gumanitar inqirozga duch kelishi mumkin.
Da Silva Yaqin Sharqdagi mojaro gumanitar yordam yetkazib berishni to‘xtatish uchun sabab bo‘lmasligi kerakligini bildirdi. U Eron va AQShni mojaro bo‘yicha kelishuvdan alohida ravishda o‘g‘it yetkazib berish muammosini imkon qadar tezroq hal qilishga chaqirdi.
