Qirg‘izistonda prezidentlik saylovi: ayrim amaldorlar ishdan olinishi mumkin

 

Qirg‘iziston prezidenti Sadir Japarov 2027-yil 27-yanvarda o‘tkaziladigan prezidentlik saylovlarini erkin, adolatli va shaffof tashkil etish chora-tadbirlari to‘g‘risidagi farmonni imzoladi.

 

Hujjat davlat va munitsipal organlarning saylov jarayoniga noqonuniy aralashuvi hamda ma’muriy resurslardan ayrim nomzodlar manfaatlari yo‘lida foydalanishining oldini olishga qaratilgan.

 

Farmonga ko‘ra, ta’lim muassasalari o‘qituvchilari va talabalari, tibbiyot va ijtimoiy soha xodimlari, shuningdek, aholiga xizmat ko‘rsatuvchi boshqa davlat va munitsipal tashkilotlar xodimlarini nomzodlarni qo‘llab-quvvatlashga qaratilgan saylovoldi tashviqotiga jalb qilish taqiqlanadi.

 

Vazirlar Mahkamasiga saylovoldi tashviqotida noqonuniy ishtirok etgan yoki xizmat mavqeidan foydalanib nomzodlardan birining manfaatlarini ko‘zlagan mansabdor shaxslarni intizomiy javobgarlikka tortish topshirildi. Zarur hollarda bunday rahbar va xodimlarni lavozimidan ozod etish chorasi ham ko‘riladi.

 

Shuningdek, Markaziy saylov komissiyasiga saylov qonunchiligining bir xilda qo‘llanilishini ta’minlash va fuqarolarni xabardor qilish bo‘yicha qo‘shimcha choralar ko‘rish tavsiya etilgan.

 

Farmonda Qirg‘iziston qonunchiligiga muvofiq xalqaro kuzatuvchilarning saylov jarayonidagi ishtirokini ta’minlash ham nazarda tutilgan.