Afinada bino portladi: olti kishi halok bo‘ldi
Portlash gaz infratuzilmasi bilan bog‘liq bo‘lishi mumkinligi aytilmoqda.
Afinaning sayyohlar gavjum Plaka hududida ikki qavatli turar joy binosi portlash oqibatida qulab tushdi. Hodisa natijasida olti kishi halok bo‘lgan.
Gretsiya yong‘in xavfsizligi xizmati ma’lumotiga ko‘ra, qutqaruvchilar vayronalar ostidan olti kishining jasadini topgan. Ular bir xonadonda yashagan keksa er-xotin va boshqa xonadonda istiqomat qilgan to‘rt nafar sayyoh bo‘lgan.
Portlash sabablarini aniqlash uchun yong‘in xavfsizligi xizmatining tergov bo‘linmasi voqea joyida ish olib bormoqda. Hududda gaz hidi sezilgani haqida xabarlar kelib tushgan. Afina meri portlash gaz infratuzilmasi bilan bog‘liq bo‘lishi mumkinligini bildirgan.
Politsiya ma’lumotiga ko‘ra, halok bo‘lgan sayyohlar ikki amerikalik juftlik bo‘lgan. Ular juma kuni soat 15:00 da Afinadan parvoz qilishi kerak edi, biroq aeroportga kelmagan.
Portlash natijasida yaqin atrofdagi uylar, do‘konlar va avtomobillarga ham zarar yetgan. Bino qoldiqlari va singan oynalar uch kvartalgacha bo‘lgan hududga sochilib ketgan.
Voqea Afinaning Akropol va Zevs ibodatxonasi kabi mashhur sayyohlik maskanlari yaqinida sodir bo‘lgan.
