Namangan bog‘chasidagi jinsiy zo‘ravonlik: jinoyat ishi prokuraturaga o‘tkazildi
Tergov ustidan nazorat shaxsan Bosh prokuror tomonidan o‘rnatilgan.
Namangan viloyati Uchqo‘rg‘on tumanidagi davlat maktabgacha ta’lim tashkilotida voyaga yetmagan shaxs zo‘rlangani holati yuzasidan jinoyat ishi qo‘zg‘atildi. Bu haqda Bosh prokuratura rasmiy bayonot berdi.
Ma’lum qilinishicha, holat yuzasidan Jinoyat kodeksining 118-moddasi (nomusga tegish) va 112-moddasi (o‘ldirish yoki zo‘rlik ishlatish bilan qo‘rqitish) bilan jinoyat ishi qo‘zg‘atilgan.
Jinoyat ishi doirasida bir nafar shaxsga nisbatan qamoqqa olish ehtiyot chorasi qo‘llangan.
Hozirda jinoyat ishi Namangan viloyati prokuraturasining ish yurituviga o‘tkazilgan va tergov harakatlari olib borilmoqda. Tergov ustidan nazorat shaxsan Bosh prokuror tomonidan o‘rnatilgan.
Prokuratura tomonidan jinoyat ishi har tomonlama, to‘liq va xolisona tergov qilinishi hamda voyaga yetmagan jabrlanuvchining huquq va qonuniy manfaatlari himoya qilinishi ta’minlanishi bildirildi.
Jinoyatga aloqadorlik, holatlarni yashirish yoki mas’ul shaxslarning harakatsizligi bilan bog‘liq aniqlangan har bir holatga qonunchilikda belgilangan tartibda huquqiy baho berilishi qayd etilgan.
Tergov natijalari haqida qonunchilikda belgilangan tartibda ma’lumot beriladi.
