Surxondaryoda yer oldi-sotdisi ortidan mojaro: 32 yoshli erkakni kaltaklab o‘ldirgan besh kishi qamaldi

Surxondaryo viloyati Denov tumanida yer oldi-sotdisi bo‘yicha kelishmovchilik ortidan 32 yoshli erkakning kaltaklab o‘ldirilishi yuzasidan sud hukmi chiqarildi. 

 

Ish hujjatlariga ko‘ra, Yangihayot mahallasida yashovchi, 1989-yilda tug‘ilgan shaxs mulkiy nizoni zo‘ravonlik yo‘li bilan hal qilishga qaror qilgan. U 22–30 yoshdagi to‘rt nafar tanishini ham jalb qilgan.

 

Ular 27-aprel kuni soat 17:30 atrofida Lacetti va Nexia avtomobillarida Bog‘ishamol mahallasidagi avtomobil yuvish shoxobchasi oldiga borib, u yerda bo‘lgan ikki nafar qarindoshini kaltaklagan.

 

Shundan so‘ng ulardan biri majburan Lacetti avtomobiliga o‘tqazilib, Uzun tumanidagi Bobotog‘ hududiga olib borilgan. U yerda uning tanasiga og‘ir tan jarohatlari yetkazilgan. Guvohlarning ko‘rsatmalariga ko‘ra, jabrlanuvchiga elektroshoker yordamida ham ta’sir o‘tkazilgan.

 

Og‘ir tan jarohatlari olgan 32 yoshli erkak Denov tuman tibbiyot birlashmasining shoshilinch tez tibbiy yordam bo‘limi kirish qismiga tashlab ketilgan. 

 

Shifokorlar tomonidan reanimatsion choralar ko‘rilgan, biroq uning hayotini saqlab qolishning imkoni bo‘lmagan va biologik o‘lim qayd etilgan.

 

Sudda aniqlanishicha, jabrlangan ikki kishi ota-bola bo‘lib, ular guruh tashkilotchisining tog‘asi va jiyani bo‘lgan. Nizo yer oldi-sotdisi masalasidagi kelishmovchilik sabab yuzaga kelgan.

 

Bundan tashqari, ish hujjatlariga ko‘ra, guruh tashkilotchisining xonadonidan 6 grammdan ortiq turli ko‘rinishdagi giyohvandlik vositalari aniqlangan.

 

Sud hukmiga ko‘ra, besh nafar sudlanuvchiga 4 yildan 9 yilgacha ozodlikdan mahrum qilish jazosi tayinlangan. Jinoyat kodeksining 59-moddasiga muvofiq, jazolar qisman qo‘shilgan va ayrim sudlanuvchiga uzil-kesil 9 yil muddatga ozodlikdan mahrum qilish jazosi belgilangan.