Uchrashuvga kelgan yigit kaltaklandi: ikki kishiga jinoyat ishi qo‘zg‘atildi
Buxoroda ota qizi bilan ko‘rishish uchun kelgan 17 yoshli bolani mashinada majburan olib ketib, kaltakladi.
Ijtimoiy tarmoqlar va ayrim OAVlarda Buxoro viloyatida voyaga yetmagan bolaga nisbatan zo‘ravonlik qilingani haqida xabarlar tarqaldi. Bolalar ombudsmani holat yuzasidan munosabat bildirdi.
Aniqlanishicha, 28-avgust kuni Buxoro viloyatida yashovchi E. R. qizi O. D. bilan ko‘rishish uchun kelgan, 2009-yilda tug‘ilgan voyaga yetmagan E. O. ni majburan avtomashinaga o‘tqazib, qarindoshi F. F. ning uyiga olib borgan. U yerda voyaga yetmagan yigit boshqa shaxslar bilan birga kaltaklangan.
Tergovga qadar tekshiruv doirasida tayinlangan sud-tibbiy ekspertizasiga ko‘ra, E. O. ning tanasining turli sohalarida jarohatlar mavjudligi aniqlangan.
Holat yuzasidan 7-sentyabr kuni E. R. va F.F .ga nisbatan Jinoyat kodeksining 137-moddasi 2-qismi «a, v» bandlari hamda 105-moddasi 2-qismi bilan jinoyat ishi qo‘zg‘atilgan.
Mazkur jinoyat ishi bo‘yicha dastlabki tergov harakatlari tuman prokuraturasi tomonidan olib borilmoqda.
Bolalar ombudsmani voyaga yetmagan jabrlanuvchining manfaatlari, sha’ni va qadr-qimmatini inobatga olib, ishga oid tasdiqlanmagan ma’lumotlarni tarqatmaslikka chaqirdi.
Shuningdek, ombudsman bolaning protsessual huquqlari ta’minlanishi yuzasidan kuzatuvni davom ettirishini ma’lum qildi.
