“Real Sanjik” ishi: jazo o‘zgarishsiz qoldirildi
Sudda apellyatsiya shikoyatlari qisman qanoatlantirildi.
Bugun Toshkent shahar sudining jinoyat ishlari bo‘yicha sudlov hayʼati apellyatsiya instansiyasida «Real Sanjik» nomi bilan tanilgan tadbirkor Sanjar Karimovga hukm o‘qildi.
Sud hukmiga ko‘ra, Jinoyat kodeksining 168-moddasi uchinchi qismi “a” bandi bilan tayinlangan 5 yil muddatga ozodlikdan mahrum qilish jazosi o‘zgarishsiz qoldirildi.
Jinoyat kodeksining 59-61 moddalariga asosan tayinlangan har xil turdagi jazolarni to‘liq qo‘shish yo‘li bilan uzil-kesil 5 yil muddatga ozodlikdan mahrum qilish jazosi hamda bazaviy hisoblash miqdorining 400 baravari miqdorida, yaʼni 136 million so‘m jarima jazosi tayinlandi.
Shuningdek, Jinoyat kodeksining 61-moddasiga asosan tayinlangan jazolar alohida-alohida ijro etilishi belgilandi. Hukmning qolgan qismi o‘zgarishsiz qoldirildi va apellyatsiya shikoyatlari qisman qanoatlantirildi.
