Issiqlik elektr stansiyalarida 9 oyda 7 mln kub metr tabiiy gaz tejaldi
2026-yilning dastlabki to‘qqiz oyida qariyb 28 mln kVt·soat elektr energiyasi ishlab chiqarildi va tejaldi.
OAV uchun kontent tayyorlash markazida o‘tkazilgan brifingda “Issiqlik elektr stansiyalari” AJ ishlab chiqarish bosh boshqarmasi boshlig‘i G‘olibjon Salimyorov energiya samaradorligini oshirish va muqobil energiya manbalarini joriy etish bo‘yicha amalga oshirilayotgan ishlar haqida ma’lumot berdi.
Bugungi kunda jamiyat tizimida jami 15,9 megavatt quvvatga ega quyosh fotoelektr stansiyalari o‘rnatilgan. 2026-yilning yanvar–sentabr oylarida ular orqali 14,6 mln kVt·soat elektr energiyasi ishlab chiqarilib, 3,7 mln kub metr tabiiy gaz tejaldi.
Energiya samaradorligini oshirish maqsadida 1 520 ta avtonom quyosh chirog‘i, 1 783 ta harakat datchigi va elektr dvigatellariga 181 ta chastota o‘zgartirgich o‘rnatildi. Ushbu chora-tadbirlar natijasida qo‘shimcha 13,2 mln kVt·soat elektr energiyasi tejalib, yana 3,3 mln kub metr tabiiy gaz iqtisod qilindi.
Shuningdek, tizimdagi korxonalarda har biri 200 litr sig‘imga ega 117 ta quyosh suv isitkichi o‘rnatildi. Umuman, yilning dastlabki to‘qqiz oyida qariyb 28 mln kVt·soat elektr energiyasi ishlab chiqarildi va tejaldi, 7 mln kub metr tabiiy gaz iqtisod qilindi. Natijada atmosferaga taxminan 9–11 ming tonna karbonat angidrid chiqarilishining oldi olindi.
Energiya tejovchi texnologiyalarni joriy etish, qayta tiklanuvchi energiya manbalaridan foydalanishni kengaytirish va elektr stansiyalarining o‘z ehtiyojlari uchun sarflanadigan energiya miqdorini kamaytirish ishlari izchil davom ettiriladi.
