Piskentdagi mahallada bo‘rilar yurgani aytilmoqda
Holat yuzasidan rasmiy munosabat bildirildi.
Ijtimoiy tarmoqlarda Toshkent viloyatining Piskent tumanida och bo‘rilar yurgani va kechqurun yosh bola va ayollar ko‘chada yurmasligi haqidagi xabarlar tarqaldi. Mazkur holat yuzasidan Piskent tumani hokimligi rasmiy munosabat bildirdi.
Maʼlum qilinishicha, Qirqqizobod hududi tog‘li hududda joylashganligi sababli har yili qish mavsumida qor yog‘ishi oqibatida yovvoyi hayvonlar, jumladan bo‘rilar ham qishloqlarga kelishi kabi holatlar kuzatiladi.
Qayd etilishicha, yovvoyi hayvonlarni tutuvchi maxsus guruh hududga jalb etilgan. Hozirda bo‘rilarni qidirish va ularni zararsizlantirish ishlari olib borilmoqda.
Tutilgan bo‘rilarni tabiiy muhitiga yaqin sharoit yaratish maqsadida hayvonot bog‘iga yuborish rejalashtirilgan.
