1 yilgacha qamoq va 82 milliongacha jarima: O‘zbekistonda hayvonlarga nisbatan zo‘ravonlik uchun jazolar kuchaytiriladi
Ekologik partiya hayvonlarni himoya qilishga qaratilgan yangi qonun loyihasini ishlab chiqmoqda.
O‘zbekiston Ekologik partiyasi hayvonlarga nisbatan shafqatsizlik uchun javobgarlikni keskin kuchaytirishni nazarda tutuvchi qonun loyihasini ishlab chiqmoqda.
Mazkur tashabbus hayvonlarga nisbatan zo‘ravonlik holatlari saqlanib qolayotgan bir paytda ilgari surildi. Eslatib o‘tilishicha, joriy yilning 25-martidan boshlab bunday huquqbuzarliklar uchun 15 dan 25 BHMgacha miqdorda jarima (taxminan 6,1 mln so‘mdan 10,3 mln so‘mgacha) yoki 15 sutkagacha ma’muriy qamoq jazosi belgilangan.
Taklif etilayotgan yangi qonun loyihasida esa jazo choralarini yanada kuchaytirish ko‘zda tutilgan. Xususan, hayvonlarga nisbatan shafqatsizlik uchun jarimalarni 200 BHMgacha (80 mln so‘mdan ortiq) oshirish hamda bir yilgacha ozodlikdan mahrum qilish jazosini joriy etish taklif qilinmoqda.
Shuningdek, hujjatda qoidabuzarlardan jarohatlangan hayvonlarni davolash bilan bog‘liq barcha xarajatlarni to‘liq qoplash talabini belgilash ham nazarda tutilgan. Bu xarajatlar hayvonning bozor qiymatidan yuqori bo‘lgan taqdirda ham qoplab berilishi kerak bo‘ladi.
Qonun loyihasi doirasida yana bir qator tashabbuslar ham ilgari surilgan. Jumladan, hayvonlarga nisbatan shafqatsizlik tushunchasining aniq huquqiy ta’rifini kiritish, ularni saqlash uchun zarur shart-sharoitlarni belgilash, uy hayvonlari uchun qulay muhit yaratish, egalarining majburiyatlarini aniq belgilash hamda hayvonlarni qarovsiz qoldirishning oldini olish choralarini ishlab chiqish taklif qilinmoqda.
Bundan tashqari, maktablar va ommaviy axborot vositalari orqali hayvonlarga g‘amxo‘rlik qilish madaniyatini shakllantirishga qaratilgan ma’rifiy ishlarni kuchaytirish ham rejalashtirilgan.
Partiya vakillarining ta’kidlashicha, ushbu hujjat hayvonlarga nisbatan shafqatsizlik muammosini tizimli ravishda hal etish va jamiyatda ularga nisbatan insonparvar munosabatni rivojlantirishga xizmat qiladi.
Qonun loyihasi jamoatchilik fikr-mulohazalari inobatga olingan holda yana takomillashtirilishi rejalashtirilgan.
