OTM talabalarini o‘qishdan chetlatish tizimi o‘zgarishi mumkin

 

Oliy ta’lim muassasalarida akademik qarzdorligi bo‘lgan talabalarni o‘qishdan chetlatish mexanizmini joriy etish taklif qilinmoqda. Shu munosabat bilan hukumatning 2020-yil 31-dekabrda qabul qilingan "Oliy ta’lim muassasalarida ta’lim jarayonini tashkil etish bilan bog‘liq tizimni takomillashtirish chor-tadbirlari to‘g‘risida"gi 824-sonli qaroriga tegishli o‘zgartirish kiritilishi rejalashtirilmoqda.

 

Mazkur taklif Oliy ta’lim, fan va innovatsiyalar vazirligi tomonidan ishlab chiqilgan hukumat qarori loyihasida aks etgan. Unga ko‘ra, 824-son qaror bilan tasdiqlangan "Oliy ta’lim muassasalarida o‘quv jarayoniga kredit-modul tizimini joriy etish tartibi to‘g‘risida"gi nizomning 42-bandidan quyidagi jumlani olib tashlash taklif qilinmoqda:

 

"Semestr va o‘quv yili yakuni natijalariga ko‘ra akademik qarzdorligi bor ta’lim oluvchilar o‘qishdan chetlashtirilmaydi."

 

Agar bu taklif qabul qilinsa, talabalarni o‘qishdan chetlatish, qayta tiklash va kursdan kursga o‘tkazish bo‘yicha amaldagi tartib quyidagicha bo‘ladi:

• Agar talabaning GPA (o‘rtacha baholari) o‘tish balidan past bo‘lsa, u qayta o‘qishga qoldiriladi.
• Akademik qarzdorligi bor talaba faqat shu fanlarni qayta o‘zlashtirib, tegishli shartnoma mablag‘larini to‘laydi.
• Bir kursda necha marta qayta o‘qish mumkinligi bo‘yicha cheklov belgilanmaydi.

 

Loyihaga tegishli vazirlik va idoralar o‘z munosabatini bildirgan. "Ta’lim sohasidagi loyihalar markazi" loyiha ofisi bu taklifga qarshi chiqib, bunday o‘zgarish kredit-modul tizimining asosiy tamoyillariga zid ekanini ta’kidlagan.

 

Mutaxassislarning fikriga ko‘ra, akademik qarzdorlik yuzaga kelgan taqdirda, talabaga:

• Shu fanlarni boshqa semestrda qayta topshirish,
• Yoki mazkur fan o‘rniga kiritilgan yangi modulni o‘zlashtirish imkoniyati berilishi lozim.

 

Shu sababli, faqat akademik qarzdorlik tufayli talabani o‘qishdan chetlatish xalqaro tajribaga ham mos kelmaydi, deyiladi loyiha ofisi bayonotida. Shu asosda hukumatning 824-son qarori 42-bandidagi "akademik qarzdorligi bor talabalar o‘qishdan chetlashtirilmaydi" degan jumlani o‘z o‘rnida qoldirish taklif etilgan.

 

Mazkur normativ-huquqiy hujjat loyihasi bo‘yicha taklif va e’tirozlar inobatga olinib, u yakuniy shaklga yetkazilgandan so‘ng qabul qilinishi mumkin.