BAA havo mudofaasi Erondan uchirilgan ikkita dronni yo‘q qildi
Rasmiylarga ko‘ra, Eron bilan bog‘liq mojaro boshlanganidan buyon 551 ta raketa va 2265 ta dron zararsizlantirilgan.
Birlashgan Arab Amirliklari Mudofaa vazirligi mamlakat havo hujumidan mudofaa tizimlari Erondan uchirilgan ikkita uchuvchisiz uchish apparatini muvaffaqiyatli tarzda tutib qolganini ma’lum qildi.
Vazirlik tomonidan e’lon qilingan rasmiy bayonotga ko‘ra, hodisa 10-may kuni sodir bo‘lgan. Havo mudofaasi tizimlari tomonidan aniqlangan tahdidlar o‘z vaqtida bartaraf etilgan va natijada hech qanday qurbonlar, jarohatlar yoki yer usti infratuzilmasiga zarar yetmagan.
BAA Mudofaa vazirligi mamlakat xavfsizligi va suverenitetiga tahdid soluvchi har qanday harakatlarga qarshi yuqori jangovar shaylik saqlanayotganini ta’kidlagan.
Shuningdek, rasmiy ma’lumotlarga ko‘ra, Eron bilan bog‘liq mojaro kuchaygan davrdan buyon Amirliklar havo mudofaasi tizimlari jami 551 ta ballistik raketa, 29 ta qanotli raketa hamda 2265 ta dronni tutib qolgan.
Vazirlik hujumlar oqibatida turli millat vakillaridan iborat 230 kishi jarohat olganini, halok bo‘lganlar soni esa 13 nafarni tashkil etayotganini ma’lum qildi.
