2026 йилда 1 миллион фуқаро доимий иш билан таъминланади

Ўзбекистонда 2026 йилда ишсизлик ва камбағаллик даражасини 4,5 фоизгача пасайтириш режалаштирилмоқда. Бу ҳақда Олий Мажлис Қонунчилик палатаси йиғилишида Бандлик ва меҳнат муносабатлари вазири Ботир Зоҳидов маълум қилди.

 

Вазирнинг айтишича, ҳозирда мамлакатдаги ишсизлик даражаси 5,8 фоизни ташкил этиб, сўнгги йилларда ушбу кўрсаткич сезиларли даражада қисқарган. Келгусида эса асосий эътибор меҳнат бозорига янги кириб келаётган аҳолининг бандлигини таъминлашга қаратиллади.

 

Шу мақсадда 2026 йил давомида 1 миллион нафар фуқаро доимий иш жойлари билан таъминланиши режалаштирилган. Бундан ташқари, 4 миллион нафар аҳолининг даромадини ошириш, жумладан, 1 миллион нафар камбағал аҳолини даромадни кўпайтиришга қаратилган хизматлар билан қамраб олиш кўзда тутилмоқда.

 

Бандлик соҳасидаги муҳим йўналишлардан бири сифатида норасмий меҳнатни қисқартириш белгиланиб, 2026 йилда 1 миллион нафар норасмий ишлаётган фуқаронинг фаолиятини расмий секторга ўтказиш режалаштирилмоқда. Бу меҳнат бозори шаффофлигини ошириш ва ижтимоий ҳимояни кучайтиришга хизмат қилиши кутилмоқда.

 

Мазкур мақсадларни амалга ошириш доирасида қатор лойиҳалар режалаштирилган. Хусусан, “Бандлик органлари — иш берувчилар ҳамкори” лойиҳаси орқали 30 мингдан ортиқ иш берувчи билан ҳамкорлик йўлга қўйилиб, 150 минг нафар фуқаро иш билан таъминланади.

 

“Меҳнатсевар аёл” лойиҳаси доирасида 40 мингдан ортиқ имконияти чекланган фуқарони бандликка жалб этиш режалаштирилган.

 

Шунингдек, “Маҳаллий брендлар тармоғи”ни ҳудудларда кенгайтириш орқали камида 30 минг нафар аҳоли иш билан таъминланади.

 

Қишлоқ хўжалиги соҳасида ўқув-тажриба майдонларини ташкил этиш ва юқори даромадли экинларни жорий этиш орқали 250 минг нафар аҳолининг даромадини икки баробарга ошириш мақсад қилинган.

 

Маълумотларга кўра, 2025 йилнинг январ–ноябрь ойларида қарийб 5,1 миллион нафар фуқаро даромадли меҳнатга жалб этилган, шу даврда 450 мингдан ортиқ норасмий ишлаётган шахсларнинг фаолияти расмийлаштирилган.