“Абдуллоҳ” Ўзбекистон Президентига тажовуз қилишда айбланиб қамалди
Блогер Югай Валерий 3 йил 1 ой муддатга озодликдан маҳрум қилинди.
“Абдуллоҳ” номи билан танилган блогер Югай Валерий жиноят ишлари бўйича Нурафшон шаҳар суди ҳукмига кўра, 3 йил 1 ой муддатга озодликдан маҳрум қилинди. Бу ҳақда Олий суд матбуот котиби Азиз Обидов маълум қилди.
Аввалроқ ижтимоий тармоқларда блогернинг 2024-йилнинг октябр–ноябрь ойларида Корея Республикасида бўлган даврида Ўзбекистон фуқароларини ҳақорат қилган видеолари тарқалган эди. Шу сабабли у Абу Даби–Самарқанд рейси орқали Ўзбекистонга олиб келинган ва процессуал тартибда ушланган.
Суд ҳукмига кўра, блогер Жиноят кодексининг 156-моддаси (миллий, ирқий, этник ёки диний адоват қўзғатиш) 2-қисми ва 158-моддаси (Ўзбекистон Республикаси Президентига тажовуз қилиш) 3-қисми бўйича айбли деб топилган. Белгиланган жазо манзил-колонияларда ўталади.
Суд қарорига биноан, биринчи инстанция ҳукми устидан белгиланган тартибда Тошкент вилоят суди жиноят ишлари бўйича судлов ҳайъатига апелляция ёки кассация тартибида шикоят қилиш имконияти мавжуд.
