Эрондан Ўзбекистонга кислотали булутлар келиши ҳақидаги хабарлар рад этилди
Мутахассислар атмосферадаги жараёнлар сабаб кислотали ёғинларнинг узоқ масофаларга хавфли даражада етиб келиши деярли мумкин эмаслигини таъкидлади.
Ижтимоий тармоқларда Эрондан Ўзбекистон ҳамда Марказий Осиёнинг бошқа давлатларига кислотали булутлар етиб келиши мумкинлиги ҳақида турли хабарлар тарқалди. “Ўзгидромет” ушбу маълумотлар илмий жиҳатдан асосланмаганини маълум қилиб, бундай хавф мавжуд эмаслигини билдирди.
Қайд этилишича, кислотали ёғинлар атмосферада олтингугурт оксидлари (SO₂) ва азот оксидлари (NO₂) узоқ вақт давомида тўпланиб, булутларда сув буғи билан кимёвий реакцияга киришиши натижасида ҳосил бўлади. Бундай жараёнлар, асосан, йирик саноат ҳудудлари ва кучли чиқинди манбалари яқинида кузатилади.
Мутахассисларнинг таъкидлашича, ҳаво массалари узоқ масофаларга кўчиши жараёнида ифлослантирувчи моддалар концентрацияси кескин камаяди. Бунга атмосферадаги турбулентлик, вертикал аралашиш ҳамда қуруқ ва нам чўкиш жараёнлари сабаб бўлади. Шу боис манбадан минглаб километр узоқликда хавфли даражадаги кислотали ёғинлар ҳосил бўлиши деярли мумкин эмас.
Шунингдек, ёғинларнинг ҳосил бўлиши асосан маҳаллий булут шаклланиш жараёнлари билан боғлиқ. Яъни ёғинлар ҳудуд устидаги атмосферада мавжуд бўлган сув буғи ва аэрозоллар ҳисобига юзага келади.
“Ўзгидромет”нинг метеорологик кузатувлари ҳамда атмосфера ҳавоси сифати мониторинги маълумотларига кўра, кислотали булутларнинг Ўзбекистон ёки қўшни давлатлар ҳудудига кўчиб келиши хавфи кузатилмаяпти.
Шу муносабат билан мутахассислар оммавий ахборот воситалари ва ижтимоий тармоқлар фойдаланувчиларини тасдиқланмаган маълумотларни тарқатмасликка ҳамда фақат расмий манбаларга таянишга чақирди. Шунингдек, ёлғон ёки текширилмаган ахборотларни тарқатиш амалдаги қонунчиликка мувофиқ жавобгарликка сабаб бўлиши мумкинлиги эслатилди.
