Афғонистонда зилзила қурбонлари сони 1100 кишидан ошди
БМТ ва дунёнинг бир қатор етакчи давлатлари инсонпарварлик ёрдамини кўрсатишга ваъда бермоқда.
Афғонистон шарқида 31 август куни юз берган кучли зилзила оқибатида ҳалок бўлганлар сони 1124 кишига етди, 3251 киши турли даражада жароҳат олди. Афғонистон Қизил Ярим Ой жамияти маълумотларига кўра, табиий офат оқибатида 8 мингдан ортиқ уй бутунлай вайрон бўлган.
"Толибон" ҳаракати халқаро ҳамжамиятдан ёрдам сўради. БМТ ўзининг Фавқулодда вазиятларга жавоб бериш жамғармаси (CERF) орқали 5 миллион доллар ажратишини маълум қилди. Буюк Британия 1 миллион фунт стерлинг, Хитой, Ҳиндистон ва Швейцария эса инсонпарварлик ёрдамини кўрсатишга ваъда берди.
Зилзила маҳаллий вақт билан ярим тунда, Нандарғҳор вилоятининг Жалолобод шаҳридан 27 км шимоли-шарқда, 6 магнитудали куч билан содир бўлган. Унинг ўчоғи тахминан 8 км чуқурликда жойлашгани айтилмоқда. Энг кўп зарар кўрган ҳудуд Кунар вилояти бўлиб, у ерда камида учта қишлоқ бутунлай вайрон бўлган. Шунингдек, Лагҳмон, Нуристон ва Панжшер вилоятларида ҳам катта зарар қайд этилган.
Қидирув-қутқарув ишларини олиб бориш тоғли ҳудудлардаги кучли ёмғирлар, кўчки хавфи ва вайрон бўлган йўллар сабаб сезиларли даражада қийинлашмоқда. Ҳалок бўлганлар сони янада ошиши мумкинлиги ҳақида огоҳлантирилмоқда.
