АҚШнинг Эронга қарши уруши яқин кунларда қайта бошланиши мумкин — Axios
Сулҳ битими тугаш арафасида, янги музокара санаси ҳали белгиланмаган.
Axios нашрининг АҚШ расмийларига таяниб хабар беришича, АҚШ президенти Дональд Трамп шанба куни Оқ уйда Ҳормуз бўғози атрофидаги вазият ҳамда Эрон билан давом этаётган музокараларга бағишланган махсус йиғилиш ўтказган.
Манбаларга кўра, Эрон билан боғлиқ вазият муҳим босқичга етган бўлиб, амалдаги сулҳ келишуви уч кун ичида якунланиши кутилмоқда. Шу билан бирга, АҚШ ва Эрон делегациялари ўртасидаги навбатдаги учрашув санаси ҳозирча расман белгиланмаган.
Нашр қайд этишича, Эроннинг Ҳормуз бўғозини яна ёпиши ҳамда айрим кемаларга ҳужумлар содир бўлгани ҳақидаги хабарлар Трампнинг “яқин бир-икки кун ичида келишувга эришиш мумкин” деган баёнотидан кўп ўтмай пайдо бўлган.
АҚШнинг юқори мартабали расмийси сўзларига кўра, агар қисқа муддат ичида музокараларда силжиш бўлмаса, ҳарбий ҳаракатлар яқин кунларда қайта бошланиши мумкин.
Брифингда вице-президент Ж.Д. Вэнс, Давлат котиби Марко Рубио, Мудофаа вазири Пит Хегсет, Ғазначилик вазири Скотт Бессент ҳамда миллий хавфсизлик тизимининг бошқа юқори лавозимли вакиллари иштирок этгани маълум қилинган.
