Эрон денгиз флоти душманларга зарба беришга тайёр — Хоманаий
Эрон Олий раҳбари денгиз флоти ҳар қандай таҳдидларга қарши жавоб беришга тайёрлигини маълум қилди.
Эрон Олий раҳбари Мужтабо Хоманаий мамлакат армияси куни муносабати билан йўллаган табригида Эрон денгиз флоти ҳар қандай таҳдидларга қарши қатъий жавоб беришга тайёр эканини билдирди.
IRNA агентлиги хабарига кўра, табрик матнида Эрон қуролли кучлари, хусусан, денгиз флоти салоҳияти юқори баҳоланиб, мамлакат хавфсизлигини таъминлаш йўлида янги вазифалар белгилаб берилган.
Хоманаий ўз мурожаатида Эрон армиясининг мудофаа қудратини янада мустаҳкамлаш, замонавий технологиялар ва ҳарбий имкониятларни кенгайтириш зарурлигини таъкидлаган.
Баёнотда, шунингдек, дрон ва денгиз кучларининг ҳар қандай душманона ҳаракатларга қарши тезкор жавоб қайтаришга тайёр экани қайд этилган.
Маълумот учун, Эрон армияси куни ҳар йили 18 апрель санасида нишонланади. Бу сана Ислом инқилобидан кейин жорий этилган бўлиб, мамлакат мунтазам армияси фаолиятига бағишланган.
Мазкур баёнот Эрон томонидан Ҳормуз бўғози устидан ҳарбий назорат кучайтирилгани ҳақидаги хабарлар фонида янграган.
