Жанубий Суданда 7,5 миллион киши озиқ-овқат ёрдамига муҳтож
БМТ Жанубий Судандаги кескинлашаётган вазиятдан жиддий хавотир билдирди.
Бирлашган Миллатлар Ташкилоти Жанубий Судандаги хавфсизлик ва гуманитар вазият тобора ёмонлашиб бораётганидан жиддий хавотир билдирди. Бу ҳақда БМТ Хавфсизлик Кенгашида мамлакатдаги ҳолат юзасидан ўтказилган йиғилишда маълум қилинди дейди ТАСС.
Жанубий Судандаги БМТ миссияси раҳбари Анита Кики Гбеҳо сўзларига кўра, мамлакатда хавфсизлик ҳолати ўта ташвишли бўлиб қолмоқда. У 2025 йилда ҳалок бўлганлар ва жароҳатланганлар сони 2024 йилга нисбатан 40 фоизга ошганини қайд этган.
БМТ Бош котибининг гуманитар масалалар бўйича ўринбосари эса оммавий кўчишлар, озиқ-овқат танқислиги ҳамда тиббий ёрдам етишмовчилиги кучайганини билдирган.
Унинг маълумотига кўра, 2025 йил декабридан буён қарийб 250 минг киши ўз уйини тарк этишга мажбур бўлган. Фақат Жонглеи штатининг ўзида 1,35 миллион фуқаро тиббий хизматдан маҳрум бўлган.
Шунингдек, БМТ ҳисоб-китобларига кўра, жорий йилда 7,5 миллиондан ортиқ аҳоли озиқ-овқат ёрдамига муҳтож бўлади.
Жанубий Судандаги вазият ўтган йилдан буён ҳукумат кучлари ва қуролли мухолифат ўртасидаги тўқнашувлар сабаб янада мураккаблашган.
