АҚШ кучлари халқаро сувларда Эрон билан боғлиқ кемаларни қўлга олади — WSJ
АҚШ денгиз блокадаси Яқин Шарқдан ташқарига ҳам ёйилиши режалаштирилмоқда.
The Wall Street Journal нашрининг хабар беришича, АҚШ ҳарбий кучлари халқаро сувларда Эрон билан алоқадор деб гумон қилинган нефть танкер ва тижорат кемаларини қўлга олиш амалиётларини бошлашга тайёргарлик кўрмоқда.
Манбаларга кўра, Вашингтон яқин кунларда мазкур турдаги кемаларга чиқиш ва уларни текшириш амалиётларини фаоллаштиришни режалаштирмоқда. Бу орқали АҚШнинг денгиздаги назорат чораларини Яқин Шарқ ҳудудидан ташқарига кенгайтириш кўзда тутилмоқда.
Нашр таъкидлашича, ушбу стратегия Эрон нефтини ташувчи танкерлар ҳамда Ислом Республикаси билан боғлиқ логистика ва юк ташиш тармоқларига тегишли кемаларни глобал миқёсда кузатиш ва чеклашга қаратилган бўлиши мумкин.
Аввалроқ АҚШ Марказий қўмондонлиги томонидан эълон қилинган маълумотларда ҳам Эрон билан боғлиқ денгиз йўлларида қатновни назорат қилиш ва айрим кемалар ҳаракатини чеклаш чоралари кўриб чиқилаётгани қайд этилган эди.
