O‘zbekistonda 2026-yil 15-yanvardan 28-fevralga qadar aholi va qishloq xo‘jaligini ro‘yxatga olish rejalashtirilgan. Jarayon davomida fuqarolarga jami 71 ta savol beriladi. Biroq so‘rovnomada nogironlikka oid savollarning kiritilmagani jamoatchilik, xususan, nogironligi bo‘lgan shaxslar huquqlari faollari e’tiroziga sabab bo‘lmoqda. Bu haqda Gazeta xabar bermoqda.
Ekspertlarning ta’kidlashicha, rasmiy statistikada qayd etilgan nogironligi bo‘lgan shaxslar soni real holatni to‘liq aks ettirmaydi. Tadqiqotchi Dilmurod Yusupovga ko‘ra, O‘zbekistonda nogironligi bo‘lgan shaxslar ulushi rasman 2,8 foiz deb ko‘rsatilmoqda, holbuki xalqaro tadqiqotlar bu ko‘rsatkich ancha yuqori bo‘lishi mumkinligini ko‘rsatadi.
Nogironlar assotsiatsiyasi vakillari aholini ro‘yxatga olish jarayonida BMT tomonidan tavsiya etilgan maxsus savollarni kiritish orqali nogironligi bo‘lgan shaxslarning ijtimoiy-iqtisodiy holatini aniqlash mumkinligini ta’kidlamoqda. Bu ma’lumotlar ta’lim, bandlik, sog‘liqni saqlash va ijtimoiy himoya sohalarida samarali siyosat yuritish uchun muhim ekani qayd etildi.
Gazeta mas’ul tashkilotlardan ushbu savollarning nega so‘rovnomaga kiritilmagani yuzasidan izoh olishga uringan, biroq Statistika qo‘mitasi va xalqaro tashkilotlardan rasmiy javob olinmagan. Mutaxassislar esa bu masala ochiq qolmasligi, nogironligi bo‘lgan shaxslar ham to‘liq hisobga olinishi zarurligini ta’kidlamoqda.