Ислом цивилизацияси маркази – Евроосиёнинг янги геостратегик маркази — Forbes

Тошкент шаҳридаги Ислом цивилизацияси марказининг расмий очилиш кунида нуфузли халқаро нашр Forbes таҳлилий мақола эълон қилиб, унда Ўзбекистон лойиҳасини «Евроосиёдаги янги марказ» деб атади ҳамда унинг маданий-дипломатик ва геостратегик аҳамиятини таъкидлади.

 

Мақола муаллифи, таниқли геосиёсий таҳлилчи Камран Бохари, Марказ ташкил этилишини Ўзбекистонда кечаётган кенг қамровли ўзгаришлар – минтақавий ўйинчидан глобал хавфсизлик, иқтисодиёт ва маданий ҳамкорлик архитектурасининг фаол иштирокчисига айланиш жараёнининг бир қисми сифатида баҳолайди. Нашрда қайд этилишича: «Марказ Евроосиё маконида исломий интеллектуал ва маданий анъаналарни шакллантиришда Ўзбекистоннинг тарихий ўрнини намоён этувчи муҳим ташаббусдир».

 

Forbes эътиборни шу жиҳатга қаратадики, глобал беқарорлик ва «ғоялар рақобати» шароитида Ислом цивилизацияси маркази нафақат маданий объект, балки маданий кучнинг стратегик платформасига айланмоқда: «Марказ бағрикенг Марказий Осиё мусулмон анъаналари моделини намоён этиш ва конструктив мулоқот учун муҳим майдонга айланиш салоҳиятига эга».

 

Мақолада, шунингдек, Ўзбекистон Республикаси Президенти Шавкат Мирзиёев раҳбарлигида олиб борилаётган сиёсатга алоҳида эътибор қаратилган бўлиб, у исломнинг инсонпарварлик моҳиятини илгари суриш, халқаро ҳамкорликни ривожлантириш ва минтақага нисбатан янги қиёфа шакллантиришга қаратилгани таъкидланган.

 

Муаллиф фикрича, Ислом цивилизацияси маркази Ўзбекистоннинг Евроосиё, Яқин Шарқ ва Жанубий Осиё ўртасидаги маданий ва дипломатик кўприк сифатидаги янги ролининг «рамзий ва стратегик таянчи»га айланмоқда.

 

Нашрда яна таъкидланишича, Марказ ташкил этилиши Ўзбекистоннинг тарихий меросни замонавий таъсир воситалари билан уйғунлаштира оладиган давлат сифатидаги позициясини мустаҳкамлайди.

 

«Ўзбекистон ўз цивилизацион меросини глобал барқарорлик ва барқарор ривожланишни қўллаб-қувватловчи замонавий маданий куч воситасига айлантирмоқда», — дейилади материалда.

 

Forbes Марказ очилишини фақат миллий воқеа сифатида эмас, балки кенгроқ геоиқтисодий ва геосиёсий стратегиянинг бир қисми сифатида баҳолайди. Ушбу стратегия доирасида Тошкент Евроосиёнинг муҳим тугунларидан бири сифатида ўз позицияларини мустаҳкамламоқда.

 

Марказ очилган куни эълон қилинган мазкур мақола Ўзбекистонга бўлган халқаро қизиқиш ортиб бораётганини ҳамда унинг маданият, илм-фан ва цивилизациялар мулоқоти орқали янги глобал мувозанатни шакллантиришдаги ўрни мустаҳкамланиб бораётганини тасдиқлайди.