Ukraina portlaridagi g‘alla jahon bozoriga chiqarilsa-da, Rossiyaga qarshi sanksiyalar yumshatilmaydi. Bu haqda Politico gazetasi AQSH hukumatidagi manbalariga tayanib xabar berdi.
Unga ko‘ra, Vashington hozirda Turkiya va BMTning Moskva bilan don eksporti masalasida olib borayotgan muzokaralarini kuzatib bormoqda. Ammo uning natijalariga katta ishonch bilan qaramayapti.
“Amerikalik diplomatlardan biri Moskvaning so‘rovini “diplomatik tamagirlik” deb atadi. U AQSH Kremlga qarshi qaratilgan har qanday iqtisodiy bosimni bekor qilmasligini aytdi”, – deb yozadi Politico.
BMTdagi manbalardan biri Rossiyaning sanksiyalarni bekor qilish haqidagi talabi shusiz ham chigal vaziyatni murakkablashtirishini taʼkidlagan.
Avvalroq AQSH Kiyevga don saqlash uchun maxsus konteyner yetkazib bergani haqida xabar berilgandi.