Amerika Qo‘shma Shtatlari Vakillar palatasi mamlakatning turli hududlarida jumladan Texasning Yuvalde shahrida sodir bo‘lgan so‘nggi otishmalardan so‘ng yarim avtomatik qurol sotib olish yoshini 18 dan 21 ga oshiruvchi qonun loyihasini maʼqulladi.Bu haqda CNBC xabar berdi.
Maʼlum qilinishicha,Texasdagi boshlang‘ich maktablardan birida sodir bo‘lgan ommaviy otishma bilan bog‘liq fojiadan ikki hafta o‘tib, kecha, 8 iyun kuni AQSH kongressi vakillar palatasi demokratlarning ko‘pchilik ovozi bilan qurollar sotib olish bo‘yicha yoshni 18 yoshdan 21 yoshgacha oshirish bo‘yicha qonun loyihasini maʼqulladi.
Deyarli barcha demokratlar va respublikachilarning bir qismi qo‘llab-quvvatlagan qonun loyihasiga 228 deputat “yoqlab” va 199 deputat “qarshi” ovoz berdi.
AQSH prezidenti Jo Bayden o‘tgan hafta xalqqa qilgan murojaatida mamlakatda yarim avtomatik qurollarni taqiqlashni, agar buning iloji bo‘lmasa, sotib olish yoshini 21 yoshga ko‘tarishga chaqirgandi.