Armaniston Ozarbayjon bilan chegaradagi vaziyat tufayli Qozog‘istondagi KXSHT mashg‘ulotlarida ishtirok etmaydi. Bu haqda mamlakat mudofaa vazirligi ma’lum qildi.
“Arman-Ozarbayjon chegarasidagi vaziyatni hisobga olib... mudofaa vazirligi Armaniston qurolli kuchlari oldiga qo‘yilgan vazifalardan kelib chiqib Qozog‘iston Respublikasida o‘tkaziladigan KXSHT doirasidagi mashg‘ulotlarni ishtirok etmaslikka qaror qildi”, – deyiladi vazirlik axborotida.
KXSHT harbiy mashqlari 26-sentyabrdan 8-oktyabrgacha o‘tkazilishi rejalashtirilgan.
Ozarbayjon-Armaniston chegarasidagi vaziyat sentyabr o‘rtalarida keskinlashdi. 13-sentyabr kuni ikki davlat harbiylari o‘rtasida to‘qnashuvlar avj oldi. Rasmiy Boku Yerevanni provokasiyada ayblab, arman harbiylari ta’minot yo‘llarini minalashtirganini va otishmalar uyushtirganini ma’lum qilgan.
Chegaradagi keskin vaziyatni hisobga olib Armaniston KXSHTga yordam so‘rab murojaat qildi. Bundan tashqari, bosh vazir Nikol Pashinyan Samarqanddagi SHHT davlat rahbarlari sammitidagi ishtirokini bekor qildi.
Avvalroq Ozarbayjon ozod qilingan Qorabog‘ hududlarini qayta tiklash uchun qancha mablag‘ ajratganini ochiqlagandi.