AQSHning sobiq prezidenti Jo Bayden Oq uy rahbarlari orasida eng yuqori davlat pensiyasiga ega bo‘ldi. Bu haqda The New York Post nashri xabar berdi.
Nashr maʼlumotlariga ko‘ra, Bayden yiliga taxminan 417 ming dollar miqdorida nafaqa oladi. Bu ko‘rsatkich uning prezidentlik davridagi yillik maoshidan ham yuqori bo‘lib, sobiq prezident Barak Obamaning nafaqasidan qariyb ikki baravar ko‘pdir.
Milliy soliq to‘lovchilar jamg‘armasi vitse-prezidenti Damian Bredining taʼkidlashicha, Baydenning uzoq yillik siyosiy faoliyati unga bunday yuqori nafaqa tayinlanishiga sabab bo‘lgan. Uning so‘zlariga ko‘ra, Bayden prezidentlikdan ketganidan keyingi ilk yil davomida bir vaqtning o‘zida ikki davlat nafaqa jamg‘armasidan to‘lov olish huquqiga ega bo‘lgan.
Avvalroq Politiso nashri manbalarga tayanib, Bayden nafaqaga chiqqach, kamtarona turmush tarzini tanlagani, hashamatli hayotdan tiyilganini xabar qilgan edi.
Shuningdek, may oyida jurnalistlar Jeyk Tapper va Aleks Tompson muallifligidagi “Asl gunoh: Prezident Baydenning qulashi, uning yashirinishi va yana nomzodini qo‘yishdagi halokatli qarori” nomli kitob chop etildi.