АҚШ армияси 12 йилдан сўнг Суриядан чиқиб кетди

АҚШ Қуролли кучлари Суриянинг Ҳасака вилоятида жойлашган Қасрак авиабазасидан ўз қўшинлари ва ҳарбий техникасини тўлиқ олиб чиқиб кетди. Бу ҳақда ҳар икки томон расмийлари маълум қилди, дея хабaр бермоқда AP.

 

 

Қайд этилишича, пайшанба куни ҳарбий хизматчилар ва техника ортилган сўнгги карвон базани тарк этган.

 

Натижада Сурия армияси АҚШ ҳарбийлари илгари жойлашган ҳудудлардаги деярли барча ҳарбий объектлар устидан тўлиқ назоратни қўлга олган.

 

Сурия Ташқи ишлар вазирлиги бу жараённи мамлакат суверенитетининг тикланиши билан изоҳлади. Баёнотда қайд этилишича, шимоли-шарқ ва чегара ҳудудларининг марказий ҳукумат назоратига қайтиши давлатни бирлаштириш бўйича саъй-ҳаракатлар натижасидир.

 

Расмий маълумотларга кўра, АҚШ қўшинларининг чиқиб кетиши Дамашқ ҳукумати ва курдлар бошчилигидаги Сурия Демократик Кучлари ўртасидаги келишувлар ҳамда “ИШИД” гуруҳига қарши курашдаги натижалар билан боғлиқ.

 

Тим Ҳавкинс АҚШ Марказий қўмондонлиги номидан чиқиб кетиш жараёни якунланганини тасдиқлади. Унинг айтишича, жараён “режа асосида ва шартларга мувофиқ” амалга оширилган. Шу билан бирга, АҚШ ҳарбийлари минтақада терроризмга қарши кураш бўйича ҳамкорликни давом эттиришини билдирган.

 

 

АҚШ қўшинларининг чиқиши февраль ойидан бошланган бўлиб, аввалроқ ал-Танф базаси ҳам топширилган эди.

 

Шунингдек, АҚШ кучлари Суриядаги ҳибс марказларида сақланган тахминан 5 700 нафар “ИШИД”га алоқадор гумонланувчиларни Ироқдаги жазони ижро этиш муассасаларига кўчирган.

 

АҚШ ҳарбийларининг Суриядаги асосий вазифаси “ИШИД” гуруҳининг қайта кучайишининг олдини олиш бўлган. Гуруҳ 2019 йилда ўзининг сўнгги ҳудудини йўқотган бўлса-да, унинг яширин жамоалари ҳанузгача минтақада вақти-вақти билан ҳужумлар уюштириб келмоқда.