Buyuk Britaniya hukumati mamlakatdagi migratsiya siyosatini keskin qayta ko‘rib chiqmoqda. BBC xabariga ko‘ra, Ichki ishlar vaziri Shabana Mahmud yaqin kunlarda yangi tartiblarni e’lon qilishi kutilyapti. Takliflarga muvofiq, Britaniyaga noqonuniy yo‘l bilan kirib kelgan va boshpana so‘ragan shaxslar doimiy yashash uchun ariza topshirishdan avval 20 yil kutishga majbur bo‘ladi.
Qonuniy yo‘l bilan kirgan migrantlar uchun ham shartlar yengil bo‘lmaydi — ular uchun doimiy yashash huquqiga ariza berish muddati 10 yil etib belgilanadi. Hozirgacha esa boshpana maqomi 5 yil faol bo‘lib, keyin doimiy yashashga murojaat qilish imkoniyati mavjud edi. Hukumat endilikda bu muddatni qisqartirib, maqomni muntazam qayta ko‘rib borishni rejalamoqda.
Londonda muhokama qilinayotgan tartiblarga ko‘ra, agar boshpana talab qilgan shaxs kelgan mamlakat “xavfsiz davlat” deb topilsa, ular o‘z yurtiga deport qilinadi. Yangi choralar migrantlar oqimini kamaytirish va Britaniyaning ichki xavfsizligini kuchaytirishga qaratilgan.