Бухоро ва Сурхондарё вилоятларида Меҳрибонлик уйлари ёпилди
Шу билан фаолияти тўхтатилган ташкилотлар сони 8 тага етди.
Дастлаб Наманган, Навоий, Фарғона ва Хоразм вилоятларида, шунингдек, Қорақалпоғистон Республикасида Меҳрибонлик уйлари ёпилиб, жами 1007 нафар бола ўз оиласига эга бўлди. Улар “Оилавий” болалар уйига қабул қилинмоқда ёки ўз қариндошлари томонидан васийликка олинмоқда.
Сурхондарё ва Бухоро вилоятларидан ҳам Меҳрибонлик уйлари ёпилиб, фаолияти тўхтатилган ташкилотлар сони 8 тага етди.
Маълумот учун, Ўзбекистон Республикаси Президентининг “Етим болалар ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизимини жорий этиш чора-тадбирлари тўғрисида”ги қарорига кўра, «Оилавий» болалар уйини ташкил қилиш истагини билдирган 35 ёшдан 55 ёшгача бўлган юртдошларимиз ўз ҳудудидаги Халқ таълими бўлими ва васийлик кенгашларига мурожаат қилиши керак. Улар фуқаронинг шароитларини белгиланган талаб асосида ўрганиб чиқади. Агар «Оилавий» болалар уйи ташкил қилмоқчи бўлган фуқаро кўрсатилган барча талабларга мос деб топиладиган бўлса, унга энг ками беш нафардан ўн икки нафаргача бола берилади. Бу болалар учун қонунда белгиланган барча имтиёзлар жорий этилади.
