Buxoro viloyati Kogon tumanida cho‘l hududidan 4 ta qadimgi g‘or qoldiqlari topildi. Bu haqda Madaniy meros agentligi Matbuot xizmati xabar bermoqda.
Ma’lum qilinishicha, g‘orlarning kirish qismi qumlar va o‘pirilgan toshlar bilan ko‘milib, tashqi ko‘rinishidan deyarli bilinmaydi. Ular bir-biridan yuzlab metr masofalanib, qandaydir tizim va bog‘lanish aniqlanmadi.
“Gʻorlar nima maqsadda qurilganligini bilish uchun eng yirigi tanlab olindi va yoritish jihozlari yordamida 80-100 metr masofa va 10-15 metr pastlikka tushildi. Uning ayrim joylari juda tor, ayrim joylari keng va qo‘shimcha yo‘nalishlar ochilgan”, — deyiladi xabarda.
Aniqlanishicha, g‘orning geologik qatlamlari, asosan, ohaktoshdan iborat. U o‘rta asrlar davrida (XII-XIII) mahalliy konchilar tomonidan qazilib, yerosti zaxiralaridan juda keng ko‘lamda foydalanilgan. Shuningdek, undan ganch qurilish materialining xomashyosi olingan.