G‘ijduvon tumani hokimi Farhod Umarov so‘nggi kunlarda ayrim qishloq hududlarda kuzatilayotgan elektr energiyasi ta’minotidagi uzilishlar bo‘yicha aholidan uzr so‘radi. Bu haqda uning nutqi aks etgan videolavha ijtimoiy tarmoqlarda e’lon qilindi.
Hokim mazkur murojaatini ijtimoiy himoyaga muhtoj oilalar farzandlari hamda imkoniyati cheklangan bolalar uchun tashkil etilgan kunduzgi bog‘cha ochilish marosimida bildirdi. U shahar hududida uzilishlar ancha kam kuzatilayotganini qayd etdi va mavjud muammolar qisqa muddatda bartaraf etilishini ma’lum qildi.
“Fursatdan foydalanib, yuzaga kelgan vaziyat uchun uzr so‘rayman. Barchasi o‘z o‘rniga qaytadi. Rahbarlarimiz va jamoamiz bu borada izchil ish olib bormoqda”, — dedi Farhod Umarov.
Hokim elektr ta’minotidagi uzilishlarning aniq sabablari hamda ularni bartaraf etish choralari yuzasidan batafsil ma’lumot bermadi. Farhod Umarov o‘tgan hafta G‘ijduvon tumani hokimi lavozimiga kirishgan edi.