Green Card ҳақида билишингиз керак бўлган маълумотлар
АҚШ давлат департаменти томонидан ҳар йили ўтказиладиган Green Card лотореяси бу йил расман 6 октябрдан бошлаб ўйналмоқда. Ушбу жараён 2021 йилнинг 9 ноябрига қадар ўтказилади. Ғолиблар эса 2022 йилнинг май ойида эълон қилинади. Zamon.uz сайти мавсумнинг долзарб масалаларидан бири бўлган Green Card ҳақида бир қанча маълумотлар тақдим этади.
Green Card нима?
Содда қилиб тушунтирганда — Green Card лотерея. У АҚШ ташқи ишлари билан шуғулланадиган ташкилот – давлат департаменти томонидан ўтказилади. Ушбу лотереяда ҳар йили 55 минг киши ғолиб бўлади ва АҚШда ишлаш имкониятини қўлга киритади.
Green Card нима учун жорий қилинган?
АҚШ — кўп миллатли мамлакат ва у дунёнинг турли чеккаларидаги истеъдодларни йиғишга ҳаракат қилади. Бу мамлакат тараққиётининг омилларидан бири. Green Card'дан кўзланган мақсадлардан бири ҳам шу.
Ғолиблик худди оддий лотереялардаги каби аниқланади, яъни тасодифий. Ҳаммаси омадга боғлиқ.
Талаблар қандай?
Green Card'да иштирок этиш учун талабгорлар қуйидаги маълумотларни тақдим этиши керак:
- 18 ёшга тўлган бўлиши;
- Чет элга чиқиш паспорти;
- Ўрта маълумотга ёки касбий тайёргарлик талаб қилинадиган касбда камида икки йиллик тажриба;
- 600х600 дан 1200х1200 пиксельгача бўлган катталикдаги рангли сурат
Лотереяда иштирок этиш учун https://dvprogram.state.gov веб-сайти орқали рўйхатдан ўтиш лозим. Шундан бошқа барча сайт ва ташкилотлар сохта. Энг муҳими –– рўйхатдан ўтиш мутлақо бепул.
Бегона сайт ва шахсларга шахсий маълумотларингизни тақдим этиб, алданиб қолманг!
Жаҳонгир Қўзиев
