Измирда тўртинчи қаватдан тушиб кетган ўзбекистонлик аёл шифохонада вафот этди
Mарҳуманинг жасади 23 март куни Истанбул–Андижон рейси билан Ўзбекистонга олиб келинмоқда.
Туркиянинг Измир шаҳрида 4-қаватдан қулаган 22 ёшли Ўзбекистон фуқароси Севдора Ҳакимжонова шифохонада вафот этди. Бу ҳақда Истанбулдаги Бош консулхона хабар берди.
Аввалроқ Бош консулхона ҳодиса юзасидан унинг аҳволи оғир эканини маълум қилганди.
Шифокорлар томонидан кўрсатилган барча зарур тиббий муолажаларга қарамай, фуқаро вафот этган.
Маълум қилинишича, марҳуманинг жасади 23 март куни “Истанбул–Андижон” рейси билан Ўзбекистонга олиб келинмоқда.
Ҳакимжонова Туркия фуқароси бўлган шахс билан имом никоҳи орқали турмуш қурган, бироқ ушбу никоҳ расмий тарзда қайд этилмаган. Никоҳ маросими Наманган вилояти, Чуст туманида ўтказилган. Кейинчалик жуфтлик Измирга кўчиб келиб, куёвнинг қариндошлари билан бир уйда яшаган.
Шунингдек, Туркия ҳуқуқни муҳофаза қилувчи органлари ҳодиса юзасидан жиноий иш қўзғатилганини маълум қилди.
Ҳозирча Ҳакимжонованинг қулашига нима сабаб бўлганлиги аниқланмаган.
