Ҳиндистон ёки Покистон: қай бири кучли?

Сўнгги кунларда Ҳиндистонда охирги 25 йилдаги энг даҳшатли теракт содир бўлди. Ҳиндистон назорати остидаги Кашмирнинг Паҳалгам шаҳрида 26 нафар ҳинд сайёҳи ҳалок бўлди. Ушбу ҳодисадан сўнг Ҳиндистон қаттиқ чоралар кўрди. Хусусан, Покистон фуқароларини мамлакатдан чиқариб юборишга қарор қилди. Улар 29 апрелгача Ҳиндистонни тарк этиши керак.

 

Вазият тобора кескинлашмоқда. Германиянинг BILD нашри Ҳиндистон ва Покистон армияларини солиштириб, ҳарбий кучлар қайси йўналишларда тенг ва қайси йўналишларда фарқ қилаётганини таҳлил қилди.

 

Ядровий арсенал

 

Ҳиндистон 1974 йилда, Покистон эса 1998 йилда ядровий қуролга эга бўлган. Стокголм тинчлик тадқиқот институти (SIPRI) маълумотига кўра, 2024 йил бошида Ҳиндистон 172 та, Покистон эса 170 та ядровий қуролга эга эди.

 

Мудофаа бюджети

 

Ҳиндистоннинг йиллик мудофаа харажатлари қарийб 75 миллиард долларни ташкил этиб, дунёда тўртинчи ўринда туради. Покистоннинг мудофаа бюджети эса атиги 7,6 миллиард доллар (38-ўрин).

 

Армия сони

 

Ҳиндистоннинг асосий устунлиги — унинг улкан аҳолиси. 1,45 миллиард аҳолиси билан Ҳиндистон 2023 йилдан буён дунёдаги энг кўп аҳолига эга давлат ҳисобланади. Бугунги кунда Ҳиндистон армиясида 1,5 миллион аскар хизмат қилади. Покистон эса 255 миллион аҳолига эга бўлиб, унинг армияси 650 минг аскардан иборат.

 

Шу рақамларга кўра, Ҳиндистон Покистонга нисбатан сезиларли устунликка эга.

 

Бироқ бу кўрсаткичлар армияларнинг жанговар тажрибасини акс эттирмайди. Кашмир ва баъзи БМТ операцияларидан ташқари, Ҳиндистон армияси катта уруш тажрибасига эга эмас. Аксинча, Покистон армияси яқинда Афғонистонда Толибон ва ўз ҳудудида ТТП каби исломий гуруҳлар билан жанговар ҳаракатларда иштирок этган.