Ҳиндистонда 50 мингта нодир китоб сақланган қадимий ер ости кутубхонаси топилди
Кутубхона ҳозиргаса яхши сақланиб қолган.
Ҳиндистоннинг Тикамгар шаҳридаги Тал Коти саройи остидан 50 мингга яқин қадимий китоб сақланган ер ости кутубхонаси топилди. Бу топилмани туман раҳбари Вивек Кшотрия болалигидан эшитган ривоятни текшириб аниқлади.
Кутубхона яхши сақланган, ёғоч эшиклар ортида, сув ҳавзасига яқин жойда жойлашган. Унда 1944 йилги “Ганди чизгилари”, Британия даврига оид техник асарлар ва XVI асрга тегишли санскрит қўлёзмалари мавжуд.
Сарой бир неча аср аввал Бунделкҳанд ҳукмдорлари томонидан қурилган бўлиб, 1960 йилдан бери давлат коллежи сифатида фаолият юритади. Энди ушбу китобларни сақлаб қолиш ва жамоатчиликка очиш режалаштирилмоқда.
