Имконсизликдан имкон топган қизалоқ

 

Аммо орамизда шундай инсонлар борки, тақдир унга катта синов берган бўлса-да, имконсизлигини била туриб, имкон қидиради. Умид ғунчаларининг гуллашини кутади. Орзулари ушалишига ишонди. Мақсадни аниқ қўйиб, ҳаракат қилади. Имконияти чеклангани унинг интилишлари ва иқтидорини намоён этишига асло тўсқинлик қилолмайди.

“Инсон қандай қийинчиликларга дуч келмасин, у фақат олға интилсагина ўз мақсадларига етиша олади.” — Бу 14 ёшли Руҳшона Ўктамованинг ҳаётдаги шиори. Руҳшона Чуст туманининг Ёр қишлоғида таваллуд топган.У туғилган йили қиш жуда қаттиқ келади. Болани иссиқ сақлаш илинжида уйга сандал қуришади. Эндигина эмаклай бошлаган  қизалоқ сирпаниб, чўғга тушиб кетади. Ташқарида юрган оила аъзолари қизалоқнинг йиғи товушини эшитмайди. Оқибатда, оёқлари куйиб кетади. Муолажаларга қарамай, у икки оёғидан ҳам айрилади.

Тақдир уни турфа синовларга рўпара қилган бўлса-да, ҳақиқий иқтидор ҳар қандай ҳолатда, ҳар қандай кўриниш ва вазиятда ҳам ўз сўзини айтиши, чегара ва тўсиқларни ёриб, юзага чиқишига ишониб яшади.

Руҳшона ёшлигидан спортга, бадиий адабиёт ўқиш ва тикувчиликка қизиқади. Икки ярим йилдан бери спортнинг оғир атлетика турига боради. 2019 йилда Ўзбекистон чемпионатида фахрли 3-ўринни олган. Бундан ташқари, туман, вилоят бўйича ўтказилган мусобақаларда фахрли ўринларни қўлга киритган.

— Қишлоғимизга шу спорт турига ихтисослашган спорт зал очилди. У ерга қизлар ҳам қатнашарди. Уларга ҳавас қилиб, мен ҳам қатнаша бошладим. Бирин-кетин мусобақаларда ғолиб бўлгач, қизиқишим янада ортди. Бўш вақтида дўппи тикаман. Бир ҳафтада битта ёки бир яримда дўппи тикаман. Бозорга олиб чиқиб, 30-40 мингга сотамиз. Уй ишларида ойимга қарашиб тураман. Манти, ош ва турли ширинликлар пишириб тураман. Овқат қилишда бироз қийналаман. Аммо бир жойда, ҳаракатсиз ўтиришни ёқтирмайман. Мен бу ҳолатимдан хафа эмасман. Муҳими, бахтли ҳаёт кечиряпман. Орзуларимга бирин-кетин эришяпман. Аслида, менга шуни ўзи энг олий неъмат.