Ёқилғи бакларига яширилган 55 килограммлик наркотик модда фош қилинди

 

Республикамиз божхоначилари оғирлиги 55 килограммга яқин гиёҳвандлик воситалари ва сунъий наркотик моддаларни республикамизга яширинча олиб кириш учун навбатдаги найрангни қўлланган шахсни тўхтатиб қолишди. 

 

Тошкент вилояти божхона бошқармасининг “Ойбек” чегара божхона пости ходимлари томонидан Давлат хавфсизлик хизмати чегара қўшинлари ҳарбий хизматчилари билан ҳамкорликда аниқланган навбатдаги божхона қонунбузилиши ҳолатида гиёҳвандлик воситаларини республикамизга ғайриоддий усулда олиб киришга бўлган уриниш фош қилинди.

 

Республикамизга кириб келган қўшни давлат фуқароси бошқарувида енгил автотранспорт воситаси божхона кўригидан ўтказилганда, унинг газ баллони ичига турли шаклдаги 49 дона ва бензин баки ичига 31 дона полиэтилен ўрамлар моҳирлик билан яширилганлиги аниқланди.

 

Ўрамлар очиб кўрилганда эса уларнинг ичидаги модда Марказий божхона лабораториясида ўтказилган экпертиза хулосасига биноан 52 килограмм 877 грамм оғирликдаги “гашиш” ҳамда 2 килограммдан зиёд “героин” гиёҳвандлик воситаси, 1 дона елим идиш ичида модда эса 950 грамм синтетик гиёҳвандлик воситаси эканлиги аниқланди.

 

Эслатиб ўтамиз, республикамиз божхоначилари томонидан жорий йилнинг ўтган даври мобайнида аниқланган 329 та божхона қонунбузилиши ҳолатларида 298 кг. оғирликдаги гиёҳвандлик воситаларининг ноқонуний айланмасига чек қўйилган.

 

Ҳозирда ҳолат юзасидан божхона органлари томонидан терговга қадар текширув ҳаракатлари олиб борилмоқда.