Inson a’zolari savdosida gumon qilinayotgan Ukraina fuqarosi Polshadan Qozog‘istonga ekstraditsiya qilindi. Bu haqda Qozog‘iston Respublikasi Bosh prokuraturasi ma’lum qildi.
Ma’lumotlarga ko‘ra, mazkur shaxs 2017–2018 yillarda inson a’zolarining noqonuniy oldi-sotdisi bilan shug‘ullangan xalqaro uyushgan jinoiy guruh tarkibida faoliyat olib borgan.
Tergov materiallariga asosan, jinoiy guruh tirik insonlarning tana a’zolari savdosi bo‘yicha jami 56 ta noqonuniy bitim tuzgan. Ushbu bitimlar doirasida transplantatsiya amaliyotlari Qozog‘iston Respublikasining sog‘liqni saqlash muassasalarida amalga oshirilgan.
Ukrainalik ayol joriy yil mart oyida Polsha hududida qo‘lga olingan. Polsha tomoni taqdim etgan ma’lumotlarga ko‘ra, mazkur jinoiy guruh faoliyati oqibatida Qozog‘iston, Armaniston, Ozarbayjon, Ukraina, Qirg‘iziston, Tojikiston, O‘zbekiston hamda Tailandning jami 56 nafar fuqarosi jabrlangan va ularning buyraklari olib qo‘yilgan.
Hozirda ushbu ish bo‘yicha tergov harakatlari davom ettirilmoqda.