Эрон АҚШ билан навбатдаги музокараларда қатнашишни рад этди

АҚШ вице-президенти Жей Ди Ванcе бошчилигидаги делегация Эрон билан музокараларнинг янги босқичини ўтказиш учун Исломободга йўл олмоқда. 

 

АҚШ президенти Доналд Трампга кўра, АҚШ вакиллари душанба куни кечқурун Покистон пойтахтига етиб боради. Оқ уй делегация таркибига Трамп маслаҳатчилари Стиве Уиткофф ва Жаред Кушнер ҳам киритилганини билдирган. Улар аввалги музокараларда ҳам иштирок этган.

 

Бироқ Эрон томони музокараларнинг навбатдаги босқичида қатнашишини ҳозирча тасдиқламаган. Tasnim агентлиги хабарига кўра, Ҳормуз бўғозида АҚШ томонидан жорий этилган денгиз блокадаси сақланиб қолаётган бир пайтда Теҳрон делегация юбормайди.

 

Агентлик маълумотига кўра, Исломободда ўтган дастлабки музокаралардан сўнг томонлар Покистон воситачиси орқали мулоқотни давом эттирган, бироқ жараён “АҚШнинг ортиқча талаблари ва амбициялари” сабаб натижасиз якунланган.

 

Эроннинг яна бир давлат агентлиги — IRNA эса Исломободда иккинчи босқич музокаралари ўтказилиши ҳақидаги хабарларни рад этди. Агентлик АҚШ тарқатаётган маълумотларни “медиа ўйини” деб атаб, уларни ҳақиқатга тўғри келмаслигини билдирди.

 

Шу билан бирга, IRNA музокараларга тўсқинлик қилаётган асосий омиллар сифатида АҚШнинг “ҳаддан ташқари талаблари”, “нореал кутишлари”, Вашингтоннинг “тез-тез ўзгарувчи позицияси”, қарама-қарши баёнотлари ҳамда таҳдидларини кўрсатган.

 

Аввалроқ Доналд Трамп Эронни “адолатли ва оқилона битим”ни қабул қилишга чақириб, акс ҳолда АҚШ яна зарбалар бериши мумкинлигини билдирган эди.

 

Axios нашрининг ёзишича, Теҳронда АҚШнинг музокаралар ҳақидаги баёнотлари эҳтимолий ҳарбий ҳаракатлар учун ниқоб бўлиши мумкинлигидан хавотир мавжуд.

 

Маълумот учун, музокараларнинг биринчи босқичи 11–12 апрель кунлари бўлиб ўтган ва томонлар келишувга эриша олмаган. Апрель бошида келишилган икки ҳафталик сулҳ муддати эса 21 апрель куни якунига етади. Лекин Bloomberg манбалари сулҳ узайтирилиши мумкинлигини ҳам маълум қилганди.