Болтиқбўйи давлатлари Москвадаги парадга борадиган Словакия етакчисига ўз ҳаво ҳудудини ёпди
Роберт Фицо 9 май парадида қатнашиш учун бошқа парвоз йўналишини топишини айтди.
Эстония, Латвия ва Литва Словакия бош вазири Роберт Фицонинг 9 май куни Москвада ўтказиладиган парадга парвози учун ўз ҳаво ҳудудидан фойдаланишига рухсат бермади.
Бу ҳақда Эстония ташқи ишлар вазири Маргус Сахкна маълум қилиб, Эстония бундай қарорни илгари ҳам қабул қилганини ва бу йил ҳам ўз позициясини ўзгартирмаслигини билдирди.
“Россияни улуғлашга қаратилган тадбирга учиш учун Эстония ҳаво ҳудудидан фойдаланишга рухсат берилмайди. Бу тамойил ўтган йили ҳам амал қилган ва ҳозир ҳам ўз кучида қолади”, — дейилади баёнотда.
ТИВга кўра, Эстония расмий парвозлар учун рухсат беришда Европа Иттифоқи ва НАТО қоидаларига амал қилади, бироқ Россияга сафарлар бундан мустасно ҳисобланади.
Аввалроқ Роберт Фицо Литва ва Латвия ҳам унинг самолёти учун ҳаво ҳудудини ёпишини маълум қилган эди. У бу қарорга қарамай, Москвага етиб бориш учун муқобил йўналиш топишини билдирган.
“Европа Иттифоқига аъзо давлатлар бошқа бир аъзо давлат бош вазирининг ўз ҳудуди устидан учиб ўтишига йўл қўймаяпти. Шунга қарамай, мен бошқа йўл топаман”, — деган Словакия бош вазири.
Маълумот учун, 2025 йилда Москвада ўтган 9 май парадида 27 давлат етакчиси, жумладан Хитой, Беларус, Куба, Венесуэла, Словакия ва Сербия раҳбарлари иштирок этган. Ўшанда ҳам Болтиқбўйи давлатлари Роберт Фицо ва Сербия президенти Александар Вючич самолётларининг ўз ҳудудидан ўтишига рухсат бермаган.
