АҚШда даҳшатли отишма — саккиз нафар бола ҳалок бўлди
Қурбон бўлган болаларнинг ёши бир ёшдан 14 ёшгача экани айтилмоқда.
АҚШнинг Луизиана штати Шривпорт шаҳрида содир бўлган даҳшатли отишма оқибатида саккиз нафар бола ҳалок бўлди, яна икки киши тан жароҳати олди. Бу ҳақда маҳаллий полиция NBC News нашрига маълум қилди.
Дастлабки маълумотларга кўра, воқеа оилавий можаро сабаб юз берган бўлиши мумкин. Ҳодиса бир маҳалладаги иккита уйда содир бўлган, жабрланувчилардан бири эса қочиб, яқин атрофдаги учинчи уйга яширинган.
Расмийларга кўра, қуролли ҳужум натижасида жами ўн киши жабрланган. Ҳалок бўлган болаларнинг ёши бир ёшдан 14 ёшгача бўлгани айтилмоқда. Айрим қурбонлар гумондорнинг қариндошлари экани ҳам маълум қилинган.
Воқеадан сўнг ҳужумчи автомобил ўғирлаб қочишга уринган, бироқ полиция томонидан таъқиб қилиниб, махсус операция давомида отиб ўлдирилган.
Шривпорт шаҳри мэри Том Аркено ушбу ҳодисани шаҳар тарихидаги энг оғир фожиалардан бири деб атаб, мотам эълон қилинганини билдирган.
