Ишга тушмаган “Шимолий оқим-2” қувурида фавқулодда ҳолат юзага келди
Ундан газ сизиб чиққан.
Дания ҳукумати душанба куни Борнхольм ороли атрофида “Шимолий оқим-2” газ қувуридан газ сизиб чиққанини маълум қилди. Шу сабабли кемалар оролдан 5 денгиз мили узоқликда ўтиши тавсия қилинган.
Германия ҳукумати ушбу ҳолат бўйича данияликлар билан доимий алоқада эканини, унинг сабабларини ўрганаётганини таъкидлаган. Nord Stream AG газ сизиб чиқишини тасдиқлади, аммо батафсил маълумотлар берилмаган.
Дания қирғоқ қўриқлаш хизмати навигацион огоҳлантиришлар ишлаб чиққан ҳамда “Шимолий оқим -2” атрофида кемалар ҳаракатини тақиқлаган.
Газ қувури оператори ушбу лойиҳа ишга тушмаса-да, унинг ичида маълум миқдорда газ бўлганини маълум қилган. Украина можароси бошланиши арафасида “Шимолий оқим-2” ичида 300 миллион куб метр газ бўлган, аммо Германия ҳукумати 22 февралда уни ишга туширишни тўхтатиб қўйганди.
Қувур лойиҳаси Москва ва Брюссель ўртасидаги энергетик қарама-қаршиликдаги энг “қайноқ нуқта”лардан бирига айланди. Шу билан бирга Кремль бир неча бор “Шимолий оқим-2” орқали газ етказиб беришни кўпайтиришга тайёрлигини билдирган. Аммо Германия ҳукумати қувурни ишга тушмаслигини маълум қилганди.
