Turkiyaning Istanbul shahrida davom etayotgan kuchli qor yog‘ishi tufayli barcha taʼlim muassasalarida o‘qish vaqtincha to‘xtatildi. Bu haqida Istanbul gubernatori Davut Gyul o‘zining X sahifasida eʼlon qildi.
Gubernatorning so‘zlariga ko‘ra, anomal sovuq bilan kechayotgan qor yog‘ishi shahar hayotiga salbiy taʼsir ko‘rsatmoqda. Meteorologik prognozlarga ko‘ra, yog‘ingarchilik davom etishi va harorat yanada pasayishi kutilmoqda. Shu sababli 12-fevral kuni Istanbuldagi barcha o‘quv yurtlarida bir kunlik tanaffus eʼlon qilindi.
Bundan tashqari, ayrim xodimlar uchun ham maʼmuriy taʼtil joriy etildi. Xususan, nogironligi bor shaxslar, surunkali kasalliklardan aziyat chekayotganlar hamda homilador davlat xizmatchilari 12 fevral kuni ish joyiga bormasliklari mumkin deb belgilandi.
Istanbulda qishki ob-havo sharoitiga bog‘liq qiyinchiliklar yuzaga kelganligi sababli mahalliy hokimiyat fuqarolarni ehtiyot bo‘lishga va zaruratsiz ko‘chaga chiqmaslikka chaqirmoqda.