1 йиллик магистратура жорий этилади: янги ўқув йилидан таълимнинг икки йўналиши белгиланади
Амалий дастурга йўналтирилган магистратура битирувчилари мутахассислигига қараб лойиҳа, стартап, конструкторлик лойиҳаси ёки бошқа амалий ишни тайёрлаб, ҳимоя қилади.
Ҳукуматнинг 17 сентябрдаги 500-сон қарори билан олий таълим тизимида магистратура босқичида кадрлар тайёрлашни такомиллаштириш ва таълим самарадорлигини оширишга қаратилган янги тартиблар белгиланди.
Унга кўра, 2026/2027 ўқув йилидан бошлаб магистратурада кадрлар икки йўналиш бўйича тайёрланади.
Жумладан, ишлаб чиқариш (амалий) дастурига йўналтирилган магистратура камида 1 йил, илмий-педагогик дастурга йўналтирилган магистратура эса камида 2 йил давом этади.
Магистратурада таълим жараёни мутахассисликнинг ўқув режалари ва дастурларига мувофиқ кундузги, кечки ёки масофавий шаклларда ташкил этилади.
Ишлаб чиқариш (амалий) дастурига йўналтирилган магистратура битирувчилари мутахассислик хусусиятидан келиб чиқиб, лойиҳа иши, конструкторлик лойиҳаси, стартап лойиҳаси, рационализаторлик ғояси, амалий-ижодий асар ёки бошқа турдаги ишни тайёрлаб, ҳимоя қилади.
Илмий-педагогик дастур бўйича таҳсил олган магистрлар эса магистрлик диссертациясини тайёрлайди.
Шунингдек, диссертация дастлабки ҳимояга қадар плагиатга текширилади ҳамда “яширин эксперт тақризи”дан ўтказилади.
Scopus ва Web of Science маълумотлар базаларига киритилган журналларда мақола эълон қилган магистратура талабалари белгиланган тартибда рағбатлантириб борилади.
Олий таълим, фан ва инновациялар вазирлиги магистратурада ўқиш давомийлигини мутахассисликларнинг хусусиятидан келиб чиқиб мувофиқлаштирувчи орган этиб белгиланди.
Мазкур тартиблар Одил судлов академияси, Давлат сиёсати ва бошқаруви академияси, Банк-молия академияси, Вазирлар Маҳкамаси ҳузуридаги Бизнес ва тадбиркорлик олий мактаби, Тошкент давлат юридик университети ҳамда олий ҳарбий ва ҳарбийлаштирилган таълим ташкилотларига нисбатан татбиқ этилмайди.
