Jahon banki 2022 va 2023 yillarda Xitoy iqtisodiyoti o‘sishi sekinlashishini prognoz qildi. Bunga ko‘chmas mulk bozoridagi inqiroz va COVID-19 tarqalishiga qarshi kurash sabab qilib ko‘rsatilgan.
Xususan, Xitoy YAIM 2022 yilda 2.8 foizga, keyingi yil esa 4.5 foizga o‘sishi mumkin. Iyun oyida bu ko‘rsatkich mos ravishda 4,3% va 5,2% ni tashkil etishi taxmin qilingandi.
“Xitoy hukumatining koronavirus tarqalishini oldini olishga qaratilgan harakatlari jiddiy iqtisodiy oqibatlar hisobiga amalga oshirilmoqda”, – deyiladi bank hisobotida.
Ko‘chmas mulk bozoridagi vaziyat ham iqtisodiyotga o‘z taʼsirini ko‘rsatmoqda: qurilish hajmi va uy-joy sotuvi kamaymoqda, isteʼmolchilarning ko‘chmas mulk bozoriga ishonchi pasayib ketgan. Qarzga botib qolgan qurilish kompaniyalari obyektlarni oxirgacha yakunlamay, tashlab ketyapti.