O‘zbekiston Bosh vaziri o‘rinbosari Jamshid Xo‘jayev Tojikiston tomonidan o‘zbekistonlik eksportchilarga nisbatan yuqori bojxona to‘lovlari (“rastamojka”) qo‘llanayotgani sabab mahsulot narxlari oshib ketganini maʼlum qildi. Uning aytishicha, bu holat ikki davlat o‘rtasidagi savdo munosabatlariga salbiy taʼsir ko‘rsatmoqda.
Xo‘jayev taʼkidlashicha, agar qo‘shni davlat ushbu savdo cheklovlarini olib tashlamasa, O‘zbekiston ham javob choralarini qo‘llashga majbur bo‘ladi. Rasmiylar masalani muzokaralar orqali hal etish tarafdori ekanini bildirgan, biroq milliy manfaatlar himoya qilinishi ustuvor ekani qayd etilgan.
Maʼlum qilinishicha, hozirda ushbu masala yuzasidan tegishli idoralar o‘rtasida muloqotlar davom etmoqda. O‘zbekiston tomoni adolatli va o‘zaro manfaatli savdo shartlarini taʼminlashni talab qilmoqda.