Жамшид Хўжаев: Тожикистон экспортчиларимизга юқори “растаможка” қўлласа, Ўзбекистон жавоб қайтаради
Ўзбекистон Бош вазири ўринбосари қўшимча тўловлар сабаб маҳсулот нархлари ошиб кетганини таъкидлади.
Ўзбекистон Бош вазири ўринбосари Жамшид Хўжаев Тожикистон томонидан ўзбекистонлик экспортчиларга нисбатан юқори божхона тўловлари (“растаможка”) қўлланаётгани сабаб маҳсулот нархлари ошиб кетганини маълум қилди. Унинг айтишича, бу ҳолат икки давлат ўртасидаги савдо муносабатларига салбий таъсир кўрсатмоқда.
Хўжаев таъкидлашича, агар қўшни давлат ушбу савдо чекловларини олиб ташламаса, Ўзбекистон ҳам жавоб чораларини қўллашга мажбур бўлади. Расмийлар масалани музокаралар орқали ҳал этиш тарафдори эканини билдирган, бироқ миллий манфаатлар ҳимоя қилиниши устувор экани қайд этилган.
Маълум қилинишича, ҳозирда ушбу масала юзасидан тегишли идоралар ўртасида мулоқотлар давом этмоқда. Ўзбекистон томони адолатли ва ўзаро манфаатли савдо шартларини таъминлашни талаб қилмоқда.
