Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor tadbirlar natijasida Jizzax va Samarqand viloyatlarida noqonuniy dori vositalarining savdosi fosh etildi, deb xabar berdi DXX matbuot xizmati.
Jizzax shahrida o‘tkazilgan tadbirda 1993-yilda tug‘ilgan ikki nafar fuqaro tegishli ruxsat hujjatlari bo‘lmagan 400 dona “Misoprostol” tabletkalari, 139 dona kapsulalar, 2 dona balzam va 26 dona qadoqlash qutilarini 5 ming AQSh dollariga sotmoqchi bo‘lgan vaqtida ashyoviy dalillar bilan qo‘lga olindi.
Shuningdek, tergov davomida Jizzax shahridagi ayollar fitnes-klubida ushbu shaxslar tomonidan tashkil etilgan yashirin dorixona-sex aniqlanib, u yerda dorilarni qo‘lbola usulda qadoqlash va sotuvga tayyorlash ishlari olib borilgani ma’lum bo‘ldi.
Natijada, qadoqlash uskunasi, 141 dona tayyor kapsula, 1 040 dona soxta gologramma, 237 dona soxta shtrix-kod, 1 014 dona bo‘sh kapsula, shuningdek, turli quti va paketlar protsessual tartibda hujjatlashtirildi.
Shu bilan birga, DXX Samarqand viloyati boshqarmasi tomonidan o‘tkazilgan alohida tadbirda 1998-yilda tug‘ilgan, farmatsevtika mahsulotlarini chakana savdosi bilan shug‘ullanuvchi MChJ menejeri ham qo‘lga olindi. U Qirg‘izistondan noqonuniy yo‘llar orqali olib kirilgan, tarkibida psixotrop modda mavjud bo‘lgan 9 800 dona dori vositasini 25 million so‘mga sotayotgan vaqtida ushlangan.
Hozirda har ikki holat yuzasidan surishtiruv ishlari olib borilmoqda.