Toshkent shahrida murojaatni o‘rganish uchun borgan jurnalistni ichki ishlar xodimi olib ketgani va maʼmuriy javobgarlikka tortgani haqida xabar tarqaldi. Bosh prokuratura mazkur holat bo‘yicha rasmiy bayonot berdi.
Xabarga ko‘ra, Bosh prokuratura tomonidan Axborot va ommaviy kommunikatsiyalar agentligining Nuz.uz internet sayti muxbiri Mixail Dovlatov bilan bog‘liq holatga huquqiy baho berish haqidagi so‘rov xati ijro uchun qabul qilingan.
Aniqlanishicha, sudning qaroriga muvofiq, "Novosti Uzbekistana” internet-nashri muxbiri Mixail Dovlatovning harakatida maʼmuriy huquqbuzarlik alomatlari yo‘qligi sababli, unga nisbatan yuritilgan maʼmuriy huquqbuzarlik to‘g‘risidagi ish tugatilib, jurnalistning buzilgan huquqi tiklandi.
Jurnalist bilan bog‘liq holatga aloqador shaxslarning harakatlariga huquqiy baho berish yuzasidan xizmat tekshiruvi tayinlandi.