Кореялик олим Тошкентда илмий мақолаларни нуфузли журналларда чоп этиш бўйича семинар ўтказди

 

Илмий изланишларнинг сифатли натижа бериши ва амалий аҳамият касб этиши учун уларнинг халқаро миқёсда тан олиниши муҳим ҳисобланади. Шу мақсадда Тошкент вакцина ва зардоблар илмий-тадқиқот институтига халқаро илмий ҳамжамиятда эътироф этилган кореялик олим, нуфузли илмий журналлар муҳаррири Ёнг-Илл Леэ ташриф буюрди.

 

Ташриф доирасида институтда “Илмий ишлар ва илмий мақолаларни самарали ёзиш: нуфузли журналларда чоп этилиш йўллари” мавзусида илмий-амалий семинар ташкил этилди.

 

Семинар давомида иштирокчиларга илмий мақола ёзишнинг асосий тамойиллари, халқаро илмий журналлар талаблари, муҳаррирларнинг баҳолаш мезонлари, шунингдек, илмий ишларни юқори рейтингли журналларда чоп эттириш бўйича амалий тавсиялар тақдим этилди. Бундан ташқари, муҳаррир нигоҳи билан энг кўп учрайдиган хатолар ва уларнинг олдини олиш йўллари ҳақида атрофлича тушунтириш берилди.

 

Тадбир якунида институт раҳбарияти томонидан Ёнг-Илл Леэга илм-фан ривожига қўшган ҳиссаси ва халқаро илмий ҳамкорликни мустаҳкамлашдаги хизматлари учун фахрий профессорлик унвони тантанали равишда топширилди.

 

Мазкур семинар илмий изланишларни глобал илмий майдонга олиб чиқиш, илмий мақола ёзиш маданиятини юксалтириш ҳамда ёш тадқиқотчилар учун муҳим амалий билим ва тажрибалар бериш йўлида муҳим аҳамият касб этди.