Лавров: Европанинг газга бўлган эҳтиёжини қоплаш имкони бор
Россия бош дипломати йирик лойиҳанинг ишга туширилмаганини эслатди.
“Шимолий оқим-2” Европанинг газга бўлган эҳтиёжини тўлиқ қоплайди. Бу ҳақда Россия ташқи ишлар вазири Сергей Лавров маълум қилди.
“Ушбу газ қувури Европанинг барча эҳтиёжларини қондиришга тайёр ҳолатда. Аммо Евроиттифоқнинг сиёсий қарорлари туфайли ишга туширилмаган”, – деган дипломат.
Шунингдек, вазир Siemens турбиналари бўйича москвага тўлиқ тушунтириш берилмаганини айтган.
Маълумот ўрнида: “Шимолий оқим-2” (“Nord stream-2”) Россия ва Германия ўртасидаги Болтиқ денгизи тубидан ўтган магистрал газ қувури бўлиб, узунлиги 1 234 кмни ташкил қилади. Қурилиш ишлари 2016 йилда бошланган бўлиб, 2021 йилда якунланган. Ушбу ноёб лойиҳада қувурлар тўлиқ денгиз тубидан ўтади ҳамда Россия, Финляндия, Швеция, Дания ва Германия ҳудудий сувларига ётқизилган.
Россия-Украина ўртасида ҳарбий можаро бошлангач, ЕИ қувурга санкция жорий этди.
Аввалроқ Германия канцлери Москвани газ етказиб беришда ишончсиз ҳамкор сифатида айблаганди.
